Хочо хомунаалынай хаһаайыстыбатын үлэһиттэрэ баһаары умуруорустулар

Саха сиригэр ойуурга уот турар кутталлаах кэмигэр хаһааҥҥытааҕар даҕаны сэрэхтээх буолуу ирдэнэр. Ыксаллаах түгэн үөскээтэҕинэ, түргэнник тэринэн, умулларыыга-бохсууга дьон көмөтө олус суолталаах.

Ыам ыйын 10 күнүгэр Мэҥэ Хаҥалас улууһугар Чүүйэ, Наахара уонна Табаҕа  кыраныыссатыгар ыксаллаах балаһыанньа буола сырыппыт. Хата, онно суһал сулууспалар бары тэҥҥэ хамсананнар, ону тэҥэ Табаҕаттан, Наахараттан уонна Чүүйэттэн дьон көмөҕө кэлэн, уоту төгүрүйэн, салгыы Якутлесресурс тэрилтэ үлэһиттэрэ дьаһайан, салгыы уот барыыта тохтотуллубут.

Холобура, “СӨ  ОДьКХ” ГУП Мэҥэ Хаҥаластааҕы филиалын Хочо учаастагын 8 үлэһитэ бу уоту умуруорсубут.

— Биһиги ахсыа буолан Хочоттон сырыттыбыт. Бары хомунаалынай хаһаайыстыба үлэһиттэрэбит. Ол курдук, Скрябин Арылхан, Ларионов Роман, Петров Василий, Анисимов Егор, Федоров Станислав, Сивцев Пивовар, Захаров Алексей буолан умулларыыга кытынныбыт. Айылҕабыт кууран-хатан турар кэмигэр тыаҕа сылдьан уоттан сэрэхтээх буолуоҕуҥ, — диэтэ тэрилтэ маастара Василий Иннокентьевич Шестаков.

Источник: Ж. Стрюкова, газета «Саха Сирэ», фото: В. Шестаков